مدونة مجنون كمبيوتر التقنية لحلول مشاكل الكمبيوتر والاندرويد والايفون

الشراء اونلاين الفرصه واقتناصها ” تجربتى الكامله مع موقع ادفعلى ” مميزات وعيوب

17 144

الشراء اونلاين الفرصه واقتناصها ” تجربتى الكامله مع موقع ادفعلى ” مميزات وعيوب

ــــــــــــــــ

بسم الله الرحمن الرحيم

اولا اعتذر عن اللغه العاميه لكن اعتقد انها اسهل فى توصيل الفكرة والافادة وشكرا لسعه صدركم

حبيت اعرض تجربتى على حضراتكم لعل وعسى حد يستفيد منها 🙂
انا طبعا زى كتير من الناس كنت بتصفح فى مواقع زى amazon و ebay وبنبهر بالخصومات الكبييييرة اوى على المنتجات بس كنت مكتفى بالفرجه لان ما باليد حيله انى اشترى حاجه منها ولشهور كنت بتفرج لحد فى مرة عرفت ان فيه موقع اسمه ادفعلى هنتكلم عنه بالتفصيل بعدين دلوقتى فيه نقاط اساسبه لازم اوضحها عن الشراء اونلاين مميزاته وعيوبه انت الاول وقبل كل شئ لازم يكون معاك حساب Paypal ودا للاسف نتيجه سوء الاستخدام اتقفل فى مصر ولازم يكون عندك عنوان بيت فى امريكا يقدروا يشحنوا عليه ومتعاقد مع شركه شحن تجيبلك الحاجه لمصر او اى دوله انت فيها ودا طبعا عايز مجهود وانك تروح تجيب الحاجه وتخلصها فى الجمارك …………. الخ ودا بيكلف وقت وفلوس انا طبعا اول ما قرات القائمه دى زهقت وقولت اشتريها اغلى من مصر واوفر وقتى وجهدى

ف البداية هكلمكم عن الشراء اونلاين ك مميزات وعيوب بعيدا عن خدمة Edfa3ly عشان نعرف الفرق

الشراء اونلاين مميزات وعيوب

ـــــــــــــــــــــــــــــــــــــــــــــــــــــــــــــــــــــــــــــــــــــ

مميزات الشراء اونلاين

  • اولا وقبل كل شئ الخصومات الرااااااااااائعه على المنتجات الاصليه ودا ميمنعش ان برضه فيه منتجات تقليد

                 ودا بيتعرف بسهوله عن طريق السعر والبائع نفسه.

  • ثانيا ضمان الجودة لة بشترى من بائع موثوق فيه.
  • ثالثا الفخامه 😀 لما تقول بس انا جايبها من برة.

ـــــــــــــــــــــــــــــــــــــــــــــــــــــــــــــــــــــــــــــــــــــــــــ

عيوب الشراء اونلاين

اولا التقليد منتشر جدااااااااا على المواقع وباسعار مش هتتخيلها

ثانيا طول مدة الشحن وفيه بائعين بيماطلوا فى ارسال البضاعه

ثالثا  متضمنش البضاعه توصل زى ما هى وعلى الرغم ان البائع بيضمنلك فترة استرجاع تصل لشهر البضاعه اصلا بتوصلك فى حدود 21 يوم ولو حبيت ترجعها يكون الشهر خلص ولو لا قدر الله الشحنه فيها كسر او حاجه تبقى خلاص عليك 

رابعا نظام الجمارك المصرى رخم شويه مش اى حاجه تدخل مصر واسعار الجمارك عاليه على حاجات زى التلفزيونات فحاول تشترى ما قل وزنه وغلى ثمنه.

ـــــــــــــــــــــــــــــــــــــــــ

كفايه كدة لنكرهكم فى الشراء اونلاين

نرجع بقى لشركه ادفعلى دا موقع مصرى اول ما ظهر ظهر كصفحه على الفيس بوك واتطور لحد ما بقى شركه وليها عملاء دى شركه لقت ان مش كل العملاء يقدروا يشتروا اونلاين للاسباب اللى انا ذاكرها فوق فلقت حل لكل دا انت بتختار البضاعه اللى انت عايزها وتديهم اللينك بتاعها يحسبولك تكلفتها كلها بالجمارك والشحن واتعابهم ويقولك السعر النهائى مجرد ما تديهم الموافقه وتدفع الفلوس بيكونوا اشتروا الحاجه وبيدوك وقت لحد 21 يوم توصلك الحاجه لحد باب البيت ودى خدمه بصراحه ممتازة اوى

نيجى بقى لمميزات وعيوب موقع ادفعلي

مميزات وعيوب موقع ادفعلي edfa3ly

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

مميزات موقع ادفعلي Edfa3ly.com

  • اولا توفير الوقت والجهد ودا ف وجهه نظرى كفايه اوى
  • ثانيا  البضاعه من امريكا يا جدعان فيه ايه اكتر من كدة 😀
  • ثالثا  تعدد طرق الدفع يعنى ممكن تدفع اونلاين على الموقع بتاعهم او يبعتولك حد من شركه ارامكس” لانهم بيتعاملوا معاها فى الشحن” يستلم منك الفلوس ويديك عقد كضمانه انك دفعت الفلوس

ـــــــــــــــــــــــــــــــــــــــــــــــــــــــــــــــــــــــــــــــــــــــــــ

عيوب موقع ادفعلي Edfa3ly.com

  • اولا خدمه العملاء وحشه عندهم اووووووى ممكن يخلوك على الخط 10 دقايق على ما حد يكلمك

اى عيوب تانيه تتحل لو خدمه العملاء اتعدلت

بعد كل دا اديكم بقى تجربتى كلها

شرح الشراء اونلاين

شرح موقع ادفعلي دوت كوم Edfa3ly.com

 

فى البدايه انا حبيت اجرب فى حاجه رخيصه اتفرجت على الساعات لحد ما لقيت ساعه حلوة وسعرها 25$
دخلت عملت اكونت على الموقع بتاعه  http://www.edfa3ly.com.eg وسجلت دخول وضغطت على new order هيطلب منك بياناتك فى التسجيل لازم تكون صحيحه عشان دى اللى هيتواصلوا بيها معاك دخلت اللينك بتاع الساعه وقولتلهم على سعرها وسعر الشحن لداخل امريكا وهيظهرلك مجموعه طرق للدفع منها لو معاك فيزا تدفع اونلاين او الدفع يد بيد ودا اللى انا فعلا اختارته هو بيضيف تقريبا مبلغ بس فى حدود 5 ج مش كتير يعنى وبعد ما خلصت الاوردر ومواصفاته زى اللون والحجم وكدة ضغطت تاكيد وقفلت تانى يوم جالى اتصال من خدمه العملاء بياكد انى طلبت الاوردر وبيقولى انه هيوصلنى المندوب فى خلال يوم وفعلا فى خلال يوم وصل وخد منى مبلغ 37$ ودا مجموع ثمن الساعه+ الشحن + الجمارك كضمانه فى حاله انا رفضت استلام الشحنه يبقوا هم مخسروش حاجه واستنين 21 يوم وبكلمهم قالولى معلش دا الشحنه اتبعتت من غير رقم تتبع واعذار كتير كدة وجه اسبوع العيد وعدى وطبعا مفيش شغل فى العيد فصبرت لحد ما وصل وقت طلب الاوردر ل حوالى 40 يوم قولت كدا كتير وكنت كل ما اكلمهم يقولولى لو عايز تلغى الاوردر وتاخد فلوسك ماشى تمام وانا كنت عايز اشوف اخر الموضوع ايه لحد ما زهقت اتصلت قولتلهم الغوا الاوردر قالى تمام والفلوس هتوصلك فى خلال يومين وبعد يومين اتصال بيقولى الشحنه دلوقتى فى مصر وقدام حضرتك حلين يا تستلمها يا اما تلغى الاوردر وتاخد فلوسك قولت طالما وصلت مصر خلاص مش مشكله استلمها وفعلا بعدها بيومين مندوب ارامكس وصل لباب البيت معاة الساعه وشحنه بمبلغ 40 ج ودا قيمه الشحن من القاهرة للمحافظات بس الساعه جت غير اللون اللى انا طالبه بس كويس انها وصلت اصلا 🙂 وعملوا حركه حلوة قالى كتعويض على التاخير هنلغى مصاريف الجمارك والشحن من امريكا واتعابنا يعنى هخدها بسعر المصنع اللى هو 25$ ودا اللى حصل فعلا بس اللى انا استغربته ان الساعه جايه من غير علبه دا اولا لون تانى دا ثانيا من غير الضمان المذكور فى الموقع دا ثالثا بس بصراحه الساعه حلوة وكفايه usa اللى بتلمع وراها دى ^_^

ـــــــــــــــــــــــــــــــــــــــــــــــــــــــــــــــــــــــــــــــــــــــــــ

ملاحظات بقى عشان متقعش فى غلطاتى

  • اولا دور على السلعه اللى عجبتك اعرف اسعارها فى كذا موقع وشوف  وقارن بين الاسعار واقرا تعليقات الناس اللى اشتروها واشتغلت ولا لا
  • ثانيا تتاكد من رانك البائع او التقييم بتاعه على الموقع وكل ما بقى التقييم اعلى كل ما كان الموقع بيضمن البائع
  • ثالثا الشحن ومدته ودا بيذكرة البائع تحت السلعه بس غالبا بيبقى 14 يوم من البائع لحد مكتب الموقع فى امريكا
  • رابعا شوف الحاجه اللى انت عايزها من برة لو فيه زيها فى مصر ولا لا
  •  خامسا اختار الحاجه النادرة اللى مبتتكررش وكل ما زاد سعر الحاجه كل ما قلت الزيادة من الموقع عليها يعنى بمعنى انا جربت اشترى حاجه ب 2$ طلعت هتوصل ب 20$ يعنى 900% من سعرها الاصلى
  •  سادسا اشترى فى فترات الاعياد الامريكيه زى رأس السنه والهالويين وكدا لان الخصومات فيها بتبقى خياليه 

بس كفايه كدة انا تعبت يا رب تكونوا استفدتوا 🙂
لو اى حد عندة اى استفسار انا تحت امر الجميع اسف على الاطاله 🙂 

 

17 تعليقات
  1. RoMa PriNce يقول

    تجربة رائعة جدا ياأحمد بجد … انا طول عمري نفسي اشتري من موقع ebay بس انت طبعا عارف مشاكله وشحنه واسعاره بتخليني ارجع في كلامي واروح لموقع زي Souq واتخيل بس انه بينافس ebay ههههههههه عشان بس مفضلش متعلق ب ebay …
    بس موقع ادفعلي بيقدم الخدمة بطريقة كويسة اكيد لازم هيبقا في مشاكل ولو طفيفة دة طبيعي بس اهم حاجة انك زي ماقلت ( وصلت في الاخر للي انت عاوزه والساعة جت وبتلمع عليها USA )
    😀
    هههههههههههههه انا مش بحسد علي فكرة … بس الف مبروك عليك الساعة ومبروك علينا التجربة الجميلة جدا من موقع edfa3ly اللي انت قدمتهالنا … وقريب اوي ان شاء الله هحاول اشوف حاجة اشتريها واقولكم ايه الاخبار 😉

    بجد تجربة مفيدة جدا … مستنيين تقوم بتجربة تانية ان شاء الله بس المرة دي ميقوموش بأي اخطاء 😉

    1. Sameh Badr يقول

      والله جميل أوي ال feedback اللي كتبتها يا أحمد ..ومتهيأبي جت في وقتها فعلا وربنا يستر ..أنا لسه قافل مع خدمة العملا والمفروض إني هدفع انهارده في مكتب تابع لفوري علشان يبتدوا في إجراءات شحن العدسات ..معلش بقي أخوكم مجنون تصوير ومضيع فلوسه كلها علي العدسات ..والبركة في ebay & amazon

      1. Crazy Geek يقول

        منورنا دايما وسعيدين بأن المقال أفادك .. تحياتي 🙂

  2. Akram ELhosiny يقول

    اصلى يا معلم .. بالتوفيق

  3. Majnoon Computer يقول

    حقيقة شاكر جدا لجهدك الرائع المبذول ونشرك للعلم
    شرف لنا وجودك هنا ♥

  4. mega يقول

    اتشرفت بردودكم فعلا ويا رب فعلا يكون حد استفاد سعيد لوجودى فى وسط العمالقه دول شكرا تانى 🙂

  5. Ahmed Magdi يقول

    طيب ممكن تدينا صور من الساعة وازاي كان شكلها اول ماوصللت من الاخر عايزين صور للسلعة ^_^

  6. فاتن سمير يقول

    تجربتي مع شركة ادفعلي.كوم Edfa3ly.com

    يا جماعة انا عملت كذا اوردر معاهم واقسم بالله معاملتهم سيئة لاقصى درجة في حال ما اذا واجهتك مشكلة
    بس طول ما انت عميل جميل محظوظ معندوش مشاكل وبيدفعلهم بس (زي اسم الشركة) مفيش اي مشكلة

    انا في حاجات ضاعت في الاوردر بتاعي وكلمتهم بعد اكتر من ساعة في محاولات لان خطوط تليفوناتهم كلها على طول بايظة
    …. حجتهم ان عندهم ضغط فظيع كالعادة…. المهم ان بعد محاولات مستميتة للوصول اليهم يرد عليا الموظف ويقوللي ” حاضر يا فندم حنحل مشكلتك وعمره في حياته ما يتصل تاني

    ضيعولي حاجتي ورافضين يعوضوني واكلمهم ما يتصلوش تاني ويخلصوا من المكالمة كل مرة بعذر
    كأنني بشحت منهم

    ده غير انني اشتريت جهاز من امازون كان بايظ ـــ دي مش مشكلتهم انا عارفةـ–
    بس انا من حقي على الأقل الفاتورة ولا ايه؟
    طلبت فاتورة عشان اقدر اصلح الجهاز في التوكيل هنا في مصر – او اشحنه بمعرفتي تاني لأمريكا — بس رافضين والجهاز دافعة فيه اكتر من ٣٠٠ دولار يعني ١٩٠٠ جنيه مرمي في المطبخ بايظ

    اسوأ شركة في الكون اقسم بالله
    انا كنت من اكتر المشجعين ليهم لان الفكرة كنت اراها فكرة عبقرية وشباب عاملينها وكدة
    بس يفتقرون لأساليب التعامل مع العملاء ومش بعيد في وسط المكالمة الموظف يقفل السكة وترجع تتصل تاني يقولك اصل الخط قطع (حصلت معايا فوق ال٥ مرات)
    الموظفين جداد وطلاب جامعات يفتقرون الى الخبرة وغير مدربين على استقبال الشكاوى وحل مشاكل العملاء
    انا عملت معاهم ٣ اوردرات وكله مشاكل – كان كل مرة اقول لااا اكيد سوء تفاهم او سوء حظ بس وترجع المشكلة تاني

    ولا اتمنى حتى لأعدائي المرور بالمعاناة النفسية اللي انا مريت فيها بسببهم وحرق الدم والاعصاب ،لما قلتلهم انا ححكي علي مشاكلي معاكم للناس قالولي اللي يريح حضرتك يا فندم ( بالعربي كدة طز فيكي)

    ده غير اني اصلا كل مرة اروحلهم لمكتبهم في مصر الجديدة الاقي ناس بتتخانق فمن الواضح انني لست انا فقط سيئة الحظ مثل ما كنت اعتقد

    انا دي اول مشاركة ليا مع اني مسجلة من ٢٠٠٩ بس عشان احذر الناس وحكتب علي تجربتي في كل المنتديات معاهم عشان انا من شهر اكتوبر وانا متبهدلة واروحلهم وتليفونات وكل حاجة عملتها وبرده ما اخدتش حقي ويبقي فقط شكوي في جهاز حماية المستهلك ،انشالله قريب حعملها .
    واللي عايز حاجة من امريكا او انجلترا – شوب اند شيب من ارامكس تحفة والله وعمري ما قابلت مشكله معاهم بس لازم يكون عندك فيزا كارد او ماستر

    1. Majnoon Computer يقول

      سعيد جدا بتفاعلك استاذة فاتن ولكن ممكن اعرف من حضرتك الكلام ده كان امتى ؟ لان نفس المشكلة كانت بتحصل بوادر منها مع ناس وبيعوضوهم او بيحلوا المشكلة وده ف اخر شهرين , ف يا ريت اعرف من حضرتك كان امتى الكلام ده ؟

    2. noha ali يقول

      حضرتك اتعاملتي مع شوب اند شيب
      التعامل بيكون ازاي والحاجة بيوصل للبيت ولا لا؟

      1. محمد يقول

        انا عندي حساب علي شوب اند شب لو محتاجه اي استفسار تحت امرك

  7. Mr.Arsenal يقول

    شكراً على الإفادة الرائعة
    انتا قلت اشتري في فترات الاعياد واحنا داخلين على الهالويين .. هل الخصومات بتكون على كل المنتجات وللا المتعلقة بالهالووين بس ؟

    شكراً يا فندم

  8. ahmed يقول

    شكرا يا احمد على المجهود الروعة دة وجزاك الله كل خير انا اخوك احمد بردوا بعد ازنك انا هبعتلك اضافة على الفيس علشان عاوز استفسر منك على حاجات فى الموقع علشان تساعد اخوك شكررررررا يا ابو حميد

  9. Anas Abdulazix يقول

    مشكووووووووووووووووووور جداً انك شاركتنا تجربتك 🙂

  10. ADAD يقول

    أسوء شركة فى مصر بدون مبالغة
    الاوردر بقاله شهر و لسه مش عايزين يوصلوه
    تليفونهم على طول فى مشاكل و مابيجمعش و لو رضوا
    خدمة العملاء زفت و قلالات الزوق و كل يوم اتصل يقولو حتوصل بكره!!!!!!!

  11. محمد يقول

    بصراحة عندي حساب علي شوب اند شب وممتازة جدا

  12. Ashraf Galal يقول

    تحذير فى التعامل مع موقع ادفعلى : تحذير هام عند جلب طلب تالف داخليا – اى ان التلف غير ظاهر خارجيا – يعنى يظهر اثناء التشغيل فإن هذة الشركة ترفض تماما ارجاعه وبالتالى تكون الخسارة كبيرة

    للعميل وهذا عن تجربة شخصية فى اوردر رقم 370776 (هارد دسك) وبالتالى التعامل غير مضمون على الاطلاق الا فى اضيق الحدود. وذلك على الرغم من تاكيدهم انهم يردوا اليك نقودك فى حالة

    التلف لكن ذلك لا يحدث. وبالتالى اى منتج تشتريه عن طرقهم غير مضمون على الاطلاق

اترك رد

لن يتم نشر عنوان بريدك الإلكتروني.